கம்யூனிஸப் போராளி மிசாக் மனோச்சியன் பாரிஸ் பந்தியோனில் வைத்து மதிப்பளிப்பு

இனக்கொலையில் தப்பிய

ஆர்மீனிய அனாதைக்குப்

புகலிட தேசத்தில் கிடைத்த

மகோன்னத மரியாதை...

பாரிஸ், பெப்ரவரி 22

எண்பது ஆண்டுகளுக்கு முன்பு பாரிஸில் நாஸிப் படைகளால்

சுட்டுக் கொல்லப்பட்ட ஆர்மீனிய நாட்டுக் கவிஞரும் கம்யூனிஸ்ட் போராளியும் எதிர்ப்புப் படை வீரருமாகிய மிசாக் மனோச்சியன் (Missak Manouchian) பாரிஸில் உள்ள

பந்தியோன் (Panthéon) கல்லறை நினைவாலயத்தில் உள்வாங்கி அதி உயர்ந்த மதிப்பளிக்கப்பட்டிருக்கிறார். அவரது துணைவி மெலினி (Mélinée) மற்றும் அவரோடு படுகொலை செய்யப்பட்ட 23 எதிர்ப்புப் படை வீரர்களது பெயர்களும் பந்தியோனில் சேர்க்கப்பட்டுள்ளன. மிசாக் மனோச்சியனும் எதிர்ப்புப் படை வீரர்களும் (resistance fighters) பெப்ரவரி 21, 1944 அன்று பாரிஸ் அருகே மொ வலேரியன் (Mont Valérien) என்ற இடத்தில் வைத்துக் குறிபார்த்துச் சுடும் நாஸிப் படைப்பிரிவினரால் சுட்டுக் கொல்லப்பட்டிருந்தனர்.

மிசாக் மனோச்சியனை துணைவியார் சகிதம் பந்தியோனில் உள்வாங்கி அடக்கம் செய்யும் அஞ்சலி நிகழ்வு அதிபர் மக்ரோன் தலைமையில் நேற்றுப் புதன்கிழமை மாலை உணர்வுபூர்வமாக நடைபெற்றிருக்கிறது. இதன் மூலம்

பிரான்ஸின் அதி உன்னதமான - பெருமைக்குரிய - குடிமக்கள் எனக் கருதப்படுகின்றவர்களது கல்லறைகளைச் சுமந்து நிற்கின்ற பந்தியோன் நினைவாலயத்தில் உள்வாங்கப்படுகின்ற முதலாவது கம்யூனிஸ்ட் மற்றும் முதலாவது வெளிநாட்டவர் என்ற பெருமையை மனோச்சியன் பெறுகின்றார்.

படம் :பாரிஸ் பந்தியோன் கல்லறை நினைவாலயம். இது நகரின் ஐந்தாவது நிர்வாகப் பிரிவில் லத்தீன் வட்டகையில் அமைந்துள்ளது. பிரான்ஸின் வரலாற்றில் - பண்பாட்டில் அதி உன்னதமானவர்கள் எனக் கருதப்படுகின்ற 81 பேரது கல்லறைகள் இங்குள்ளன. அவர்களில் ஆறு பேர் பெண்கள்.

---

மனோச்சியன் தம்பதிகள் இருவரதும் பேழைகளை நினைவாலயத்தின் உள்ளே எடுத்து வருகின்ற "pantheonization" எனப்படும் முக்கிய நிகழ்வில் பிரான்ஸின் பிரதான அரசியல் பிரமுகர்கள் அனைவரும் கட்சி பேதம் இன்றிக் ஒன்றாகக் கலந்துகொண்டனர். அதிபர் மக்ரோன் அங்கு அஞ்சலி உரையாற்றினார்.

🔵ஆர்மீனிய இனப்படுகொலையில் தப்பியவர்

செப்ரெம்பர் 1, 1906 இல் துருக்கியின் கிராமமான அதியமானில்(Adiyaman) ஒர் ஆர்மீனிய விவசாயக் குடும்பத்தில் பிறந்த மிசாக் மனோச்சியன், 1894 மற்றும் 1896 க்கு இடைப்பட்ட காலத்தில் நிகழ்ந்த சுமார் இரண்டு லட்சம் ஆர்மீனியர்களின் படுகொலைகளது நினைவுகளுடன் தனது குழந்தைப் பருவத்தைக் கழித்தார்.1915 இல் திகில் நிறைந்த மற்றொரு இனப் படுகொலை மீண்டும் தொடங்கியது. ஒட்டமான் (Ottoman) பேரரசின் இனப்படுகொலையில் காணாமல் போன சுமார் 15 லட்சம் ஆர்மீனியர்களில் அவரது பெற்றோரும் அடங்கி இருந்தனர். அவரது தந்தை கொல்லப்பட்டார். அவரது தாயார் கடும் பஞ்சத்தின் போது இறந்துபோனார்.

இளம் அனாதையாகத் தனித்துவிடப்பட்ட மனோச்சியன் சிரியாவில் உள்ள ஒரு கிறிஸ்தவ அனாதை இல்லத்தில் அவரது சகோதரருடன் வளர்க்கப்பட்டார். அதற்கு முன்னர் குர்திஷ் குடும்பம் ஒன்றினால் அவர் பாதுகாக்கப்பட்டார் .

பின்னர் அவர் 1924 இல் பிரான்ஸின் மார்செய் நகருக்குக் குடிபெயர்ந்தார். அங்கு அவர் தச்சுத் தொழிலைக் கற்றுக்கொண்டார். பிரான்ஸின் பொதுத் தொழிலாளர இயக்கம் (CGT) நிறுவிய தொழிலாளர் பல்கலைக்கழகங்களில் பயின்றார். பாரிஸில் உள்ள Quai de Javel இல் இயங்கிய Citroën தொழிற்சாலைகளில் இரும்பு ஒட்டு வேலைத் தொழிலாளியாகப் பணியமர்த்தப்பட்ட அவர், நண்பர்களுடன் இணைந்து

 "Tchank" (முயற்சி ) மற்றும் "Machagouyt" ("கலாச்சாரம்") என்ற பெயர்களில் இரண்டு இலக்கிய இதழ்களை ஆரம்பித்தார்.

1934 இல் மனோச்சியன் பிரெஞ்சுக் கம்யூனிஸ்ட் கட்சியில் இணைந்தார்.

தனது எதிர்கால மனைவி மெலினியை அங்கேயே அவர் சந்தித்தார்.

கம்யூனிஸ்ட் எழுத்தாளர் சங்கத்திலும்

உறுப்பினரானார். பத்திரிகைகள், சஞ்சிகைகள் பலவற்றுக்குப் பொறுப்பாசிரியராக விளங்கிய அவர் கொல்லப்படும் தறுவாயில் எழுதிய கவிதைகள் இன்றும் புகழ் மிக்க படைப்புகளாக விளங்குகின்றன.

விடுதலை இராணுவத்தில் ஒரு தொண்டராக இணைந்துகொண்ட மனோச்சியன், தனது திறமையால் துப்பாக்கி சுடும் பயிற்றுவிப்பாளராக

மாறினார்.

நாஸிப் படைகளை எதிர்த்துப் போராடிய பிரெஞ்சு எதிர்ப்புப் படையுடன் இணைந்து போரிட்ட வெளிநாட்டுக் கம்யூனிஸ்ட் குழுக்களில் மனோச்சியன் மிக முக்கியமான ஒரு போராளியாக விளங்கினார்.

பிரான்ஸைப் பாதுகாக்கப் போராடிய வெளிநாட்டுச் சமூகங்களின் தியாகங்களுக்கு மதிப்பளிக்கும் நோக்குடனேயே மிசாக் மனோச்சியனைப் பந்தியோனில் உள்வாங்கும் முடிவை அதிபர் மக்ரோன் எடுத்திருந்தார்."பிரான்ஸுக்காகச் சிந்தப்பட்ட அனைவரது இரத்தமும் ஒரே நிறமே" என்று மக்ரோன் அச்சமயம் கூறியிருந்தமை குறிப்பிடத்தக்கது.

---

தாஸ்நியூஸ் - பாரிஸ்

22-02-2024