லெபனானுக்குள் தரைவழியாக நகர இஸ்ரேலியப் படை ஆயத்தமாகிறது!

முழு அளவிலான போர்

வெடிக்கின்ற ஆபத்து!!

மோதலை நிறுத்துவதற்கு

மக்ரோன் - பைடன் முயற்சி

21 நாள் போர் நிறுத்த திட்டம்

பாரிஸ், செப்ரெம்பர் 26

லெபனான் தலைநகர் பெய்ரூட் உட்பட பல இடங்கள் மீது கடந்த மூன்று, நான்கு நாட்களாகக் கடும் வான் வழித் தாக்குதல்களை நடத்திவருகின்ற இஸ்ரேல், லெபனானின் எல்லையைத் தாண்டி உள்ளே நுழைவதற்குத் தனது தரைப்படைகளைத் தயார்ப்படுத்தி

வருகிறது. இதனால் முழு அளவிலான போர் வெடிக்கின்ற ஆபத்து ஏற்பட்டிருக்கிறது.

இஸ்ரேலிய இராணுவத் தளபதி லெப்டினன்ட் ஜெனரல் ஹெர்சி ஹலேவி (Lieutenant General Herzi Halevi)

தனது துருப்பினர் மத்தியில் பேசுகையில், எல்லைதாண்டி நுழைவதற்குத் தயாராக இருக்குமாறு கேட்டிருக்கிறார் எனத் தகவல் வெளியாகி இருக்கிறது.

இஸ்ரேல் - லெபனான் எல்லையோரம் முழுவதும் உள்ள ஹிஸ்புல்லா இயக்கத்தின் நிலைகள் மீது இஸ்ரேலியப் போர் விமானங்கள் தொடர்ந்து குண்டுவீசி வருகின்றன.

இதனால் லெபனானில் பதற்றம் நிலவுகிறது. நாட்டை விட்டு வெளியேறுவதற்கு வெளிநாட்டவர்கள் தயாராகி வருகின்றனர்.

இஸ்ரேலுக்கும் ஹிஸ்புல்லா இயக்கத்துக்கும் இடையிலான மோதல் எல்லை தாண்டி லெபனான் மண்ணில் விரிவடைந்தால் பிராந்தியத்தில் முழு அளவிலான போர் ஒன்று வெடிக்கலாம் என்று கூறியுள்ள அமெரிக்காவும் பிரான்ஸும் சமாதான முயற்சிகளைத் தொடங்க வசதியாக எல்லையில் 21 நாள்கள் மோதல் தவிர்ப்புத் திட்டம் ஒன்றை முன்மொழிந்துள்ளன.

அமெரிக்க அதிபர் ஜோ பைடனும் பிரான்ஸின் அதிபர் மக்ரோனும் கூட்டாக முன்மொழிந்துள்ள இந்தத் திட்டத்துக்கு சில அரபு நாடுகளும் ஐரோப்பிய ஒன்றிய நாடுகளும் ஆதரவு தெரிவித்துள்ளன.

"லெபனானில் நரகம் கட்டவிழ்ந்து வருகிறது. தீவிர ராஜதந்திர முயற்சிகள் ஊடாக ஒரு தற்காலிகப் போர் நிறுத்தம் ஏற்படுத்தப்பட வேண்டியது மிக அவசரம்" என்று ஜ. நா. செயலாளர் நாயகம் வேண்டுகோள் விடுத்திருக்கிறார்.

"நீங்கள் இங்கே விமானங்களின் இரைச்சல்களைக் கேட்கின்றீர்கள். நாங்கள் நாள்முழுவதும் விடாமல் தாக்கிக் கொண்டிருக்கின்றோம். இவையெல்லாம் தரைவழியாக நீங்கள் உள்நுழைவதைச் சாத்தியமாக்குவதற்காகவே நடத்தப்படுகின்றன. ஹிஸ்புல்லா நிலைகளைத் தொடர்ந்து தாக்குகின்ற அதேசமயம் உள்ளே நுழையத் தயாராக இருங்கள்.. "

-இவ்வாறு இஸ்ரேலிய இராணுவத் தளபதி தனது படைவீரர்களுக்குப் பணிப்புரை விடுத்துள்ளார். இதனை அடுத்தே வெளிநாடுகள் போர்ப் பதற்றத்தில் உஷாரடைந்துள்ளன.

கடந்த திங்கட்கிழமை முதல் இஸ்ரேல் நடத்திவருகின்ற தாக்குதல்களில் 569 சிவிலியன்கள் கொல்லப்பட்டுள்ளனர் சுமார் ஜந்து லட்சம் பேர் இடம்பெயர்ந்துள்ளனர் என்று லெபனான் நாட்டு அதிகாரிகள் தெரிவித்துள்ளனர். அதேசமயம்

இஸ்ரேல் தலைநகர் ரெல்அவிவில் அமைந்துள்ள அந்த நாட்டின் மொசாட் உளவுப் பிரிவின் தலைமையகத்தை இலக்கு வைத்து ஹிஸ்புல்லா படைகள் ஏவிய பாலிஸ்ரிக் ஏவுகணை(ballistic missile) ஒன்றை இடைமறித்துத் தடுத்துள்ளதாக இஸ்ரேல் அறிவித்துள்ளது.

இதேவேளை - தெற்கு லெபனானில் நிலை ஒன்றின் மீது இஸ்ரேல் நடத்திய குண்டு வீச்சில் ஹிஸ்புல்லா இயக்கத்தின் தளபதி இப்ராஹிம் முகமது கோபேய்ஸி (Ibrahim Mohammed Kobeissi) என்பவர் கொல்லப்பட்டிருக்கின்றார். அதனை அந்த இயக்கம் உறுதிப்படுத்தி உள்ளது.

---

தாஸ்நியூஸ் - பாரிஸ்

26-09-2024